Við óskum eftir því að jafnræði gildi fyrir öll börn og ungmenni í Sveitarfélaginu Árborg
Við undirrituð íbúar í Sveitarfélaginu Árborg förum þess á leit við bæjaryfirvöld að frístundaakstri verði aftur komið á við ströndina þ.e Eyrarbakka og Stokkseyri. Þannig að börn og ungmenni sem þar búa hafi sömu möguleika á að stunda íþróttir og tómstundir á Selfossi án tillits til búsetu í sveitarfélaginu.
Akstur frístundabíls í Árborg, nema innanbæjar á Selfossi var hætt og börnum á Eyrarbakka og Stokkseyri gert að taka strætó á milli staða, sá akstur hentar engan veginn eða afar illa. Akstursplan hentar ekki við tímasetningar á æfingum og oft á tíðum eru börnin að koma of seint á sínar æfingar eða það snemma að þau þurfa að bíða mjög lengi. Strætó er með sínar stoppustöðvar á mismunandi stöðum og þurfa þau þá að fara mun lengri leið en ef um væri að ræða frístundabíl sem mun þá hafa í för með sér meiri seinkun á æfingu þegar þannig er.
Foreldrar hafa verið að hafa samband við sveitarfélagið og biðja um úrbætur en ekki fengið.
Við krefjumst þess að jafnræði sé gætt og það verði komið á akstri sem hentar börnum og ungmennum sem búa á Stokkseyri og Eyrarbakka, þannig þau geta stundað sínar æfingar til jafns við börn á Selfossi.
Það er krafa okkar að öll börn í Árborg búi við jafnræði hvað þessi mál varðar.
Sædís Harðardóttir Hafðu samband við höfund undirskriftarlistans