Áskorun til stjórnvalda - Stöðvið vanrækslu í skólakerfinu
Samkvæmt íslenskum lögum eiga börn að fá jöfn tækifæri til náms. Um það snýst skóli án aðgreiningar. Börn eiga rétt á að sækja sinn hverfisskóla þar sem komið er til móts við náms- og félagslegar þarfir án tillits til líkamlegs eða andlegs atgervis.
En á hverjum degi standa margir foreldrar og börn í harðri baráttu við skólakerfið. Baráttu sem ætti ekki að eiga sér stað, því hún snýst um þessi sjálfsögðu réttindi barnanna.
Lengi hefur verið bent á það að skóli án aðgreiningar sé lítið annað en orð á blaði. Stefnan var aldrei innleidd á viðeigandi hátt og skortur hefur verið á fjármagni. Kerfið er brotið og afleiðingarnar eru hörmulegar.
Með því að lögbinda stöður þroskaþjálfa, félagsráðgjafa, iðjuþjálfa, sálfræðinga, sjúkraþjálfa og talmeinafræðinga í skólum landsins ásamt því að tryggja fjármagn fyrir ráðningum þeirra má bæta líðan margra barna.
Við skorum á stjórnvöld að kalla til krísufund og grípa til aðgerða strax fyrir næsta skólaár!
Sagan okkar Hafðu samband við höfund undirskriftarlistans